لما نسمة بطلت عياط شالتها جدتها من حضنها وقعدت تزعقلها وتقول إنتي يا بت إنتي مش ضعيفة عشان تعيطي كل العياط ده، ومتتأثريش بكلام أبوكي وخليكي قوية عشان ميستغلكيش إنتي سمعاني ولا لا؟
رفعت نسمة راسها وسألتها: ستي هو أبويا ممكن يجوزني غصب عني؟ عشان أنا ساعتها هنتحر.
نبض قلبي لأجلك (الجزء السادس) للكاتبة لولا نور
البطل المُنتظر (الجزء 3) للكاتب عمار عبد البديع
ليلة العمر الذهبية (الجزء7)
رقية: وتنتحري ليه يا ست هانم؟ مفيش أي حد في الدنيا يقدر يخليك تعملي حاجة غصب عنك.
أنا عايزة اشوف نسمة القوية اللي مبتخفش من أي حد، لازم تواجهي وتدافعي عن نفسك، كده الناس هتدوس عليكي ومش هتعرفي تعملي أي حاجة، إنتي فاهمه كلامي؟
هزت نسمة راسها وكلمات جدتها بتتردد جواها.
وفاقت من سرحانها على صوت التليفون ورقم دولي بيرن عليها، مسكته بسرعة وردت بلهفة وهي لسه بتعيط.
نسمة: أيوه يا خالو وحشتني إنت عامل إيه؟
رد خليل بصوت كله قلق: ألو يا نسمة في إيه يا حبيبتي؟ طمنيني عليكي!
ركزت نسمة في صوتها وقالت وهي بتكدب: مفيش حاجة يا خالو، إنت بس واحشني جدًا.
خليل: متكدبيش عليا أنا عارفك كويس، مين اللي زعلك وخلاكي بتعيطي كده؟
نسمة سكتت خالص ومرديتش ترد عليه، بس خليل فضل يقولها مالك بزعيق وصوت عالي وصل لستها اللي أخدت التليفون منها وقالت: أنا هقولك يا خليل، هي معيطة عشان أبوها عايز يجوزها لفهيم، عرفت بقى السبب؟
خليل: تاني فهيم! طب والله لأعلمه الأدب.
قال الكلام ده وهو بيصرخ.
اتخضت نسمة من صراخه وشدت التليفون من ستها وسألته وهي خايفة: إنت هتعمل إيه يا خالي وإنت في البلد الغريبة دي؟ متأذيش نفسك.
رد بهدوء: أنا مش هأذي نفسي، أنا بس هخليه يقف عند حده، وأنا قاعد مكاني وده سهل جدًا.
تاني يوم قررت نسمة بعد تفكير طويل وسهر واللي عمله باباها معاها إنها تتحدى نفسها وتواجه خوفها وتحاول تعيش التجربه وراحت عشان تاخد المكان الجديد ليها في شركة الريان بعد ما شالته كريمة ليها وقالت إن هي غايبة لسبب قوي.
وقفت نسمة ورا المكتب ووقفت جنبها كريمة وبدأت تشرحلها إزاي تشتغل والملفات اللي المفروض تخلصها، وهي فضلت مركزة في كل كلامها.
حست نسمة بحد ماشي بسرعة وجاي ناحيتهم، وفجأه لقته واقف قدامهم.
قالت كريمة بصوت عالي وهي بتشدها عشان تقف جنبها: صباح الخير يا بيه.
سمعت صوته وهو بيرد التحية على كريمة ورفعت عينيها وهي مكسوفة ومترددة.
جمال ابتسم ليها وقال: أهلًا بالسكرتيرة الجديدة.
قالت بصوت واطي: أهلًا بحضرتك يا فندم محتاج مني حاجة؟
جمال: علي صوتك!
قال الجملة دي، وبعدها نسمة رفعت عينيها ليه وهي مستغربة.
جمال: اتعلمي صوتك يبقى عالي شوية وقت ما تكلميني.
هزت نسمة راسها.
جمال كمل كلامه وهو داخل المكتب وقال: شوية كده وابعتيها بالملفات يا كريمة، بعد ما تفهميها كل حاجة.
أول ما دخل المكتب نسمة خدت نفسها وقالت: يا ترى هقدر أكمل معاه إزاي؟
اتسمرت كريمة مكانها وهي بتفكر قبل ما تقول لنسمة: طب ما هو كويس ومش وحش زي ما إنتي بتقولي.
نسمة: هو إنتي مخدتيش بالك لما زعق وقال علي صوتك وإنتي بتكلميني؟
كريمة: بس ضحك، ودي من النوادر لجمال.
فاقت نسمة على كلام صاحبتها كريمة وكانت محتارة، وفجأة سمعت صوت عالي جاي من وراها.
غالية: هي دي الترقية يا هانم إنتي وهي؟
كريمة قربت من غالية اللي كانت متغاظه جامد وجواها النار وقالت: يخربيت صوتك.
غالية: بتخبوا عليا يا اللي معندكوش أصل؟
سكتت نسمة ومردتش عليها عشان هي متوترة وخايفة لوحدها.
هزت كريمة راسها وشاورتلها على الملفات الموجودة على المكتب وحطت إيديها على بق غالية وقالت: خدي الملفات دي لجمال وأنا هتكلم مع الأستاذة دي.
سمعت نسمة الكلام واتجاهلت غالية وهي عمالة تشتمها، ومشيت ببطء وهي عمالة تتنفس بصعوبة، وبعدها خبطت على باب المكتب بالراحة.
جمال: ادخل.
نسمة فتحت باب المكتب عشان تدخل ومبصيتش ليه رغم إن هي حاسة إن هو بيبصلها كويس جدًا.
جمال كان عمال يهز الكرسي بتاعه من غير ميشتغل.
نسمة قربت منه عشان تحط الملفات وقالت: اتفضل يا فندم دي الملفات اللي محتاجين امضتك عليها.
جمال: قلت علي صوتك.
كمل كلامه وقال: ليه مجيتيش من أول يوم اترقيتي فيه؟
فاجئها بالسؤال بتاعه فقالت الكلام اللي حفظته ليها كريمة قبل كده: تيته كانت تعبانة وأنا مينفعش اسيبها لوحدها.
جمال اتنهد ومسك القلم بتاعه من فوق المكتب.
نسمة: طب استأذن حضرتك ولو في أي حاجة محتاجها نادي عليا.
لفت وشها عشان تمشي بسرعة بس هو وقفها وقال: نسمة.
عضت شفايفها وهي متغاظة، وبعدين لفت ورجعتله وقالت بأدب: حضرتك تؤمر بإيه؟
رجع بضهره لورا وسند وهو مرتاح على الكرسي وقال: محتاج اشرب حاجة.
بصتله جامد وبعدين مسكت نفسها قبل ما تشتموا وتطلع الغضب اللي جواها وقالت بذوق: اجيب لحضرتك حاجة معينة تشربها؟
هز راسه قبل ما يشاور على التلاجة اللي موجودة قدام المكتب وقال: هاتي من التلاجة دي هاتي علبة عصير.
نسمة اتحركت وهي متضايقة للمكان اللي شاور فيه وقبل ما تختار واحدة من العصير قال: عصير مانجا يا نسمة.
استغلت إن هو بعيد عنها وشتمت عليه، وبعدين رجعتله وهي بتتصنع الابتسامة وقالت: اتفضل حضرتك.
مسك الإزازة منها وفي اللحظة دي إيده لمست إيديها، وعشان كده نسمة شدت دراعها بسرعة خليته يتعصب وقال: متغبيش تاني غير لما تستأذنيني، ومفيش حد يهزر معاكي وقت الشغل حتى لو وقت البريك.
قالت وهي مش مصدقة: نعم!!!
يتبع…
لمشاهدة الجزء السابع من القصة “اضغط هنا“.
لمشاهدة الجزء السادس من القصة “اضغط هنا“.
لمشاهدة الجزء الخامس من القصة “اضغط هنا“.
لمشاهدة الجزء الرابع من القصة “اضغط هنا“.
لمشاهدة الجزء الثالث من القصة “اضغط هنا“.
لمشاهدة الجزء الثاني من القصة “اضغط هنا“.
لمشاهدة الجزء الأول من القصة “اضغط هنا“.
