في واحدة من الأوض في بيت قديم كانت قاعدة نسمة على مخدة قطن وساندة ضهرها على الكنبة الخشب الصغيرة… كان الوقت الصبح بدري، وهوا الصبح كان داخل للبيت من كل الشبابيك اللي كانت مفتوحة على أخرها.. والهوا كان بيخبط في وش نسمة، والجدة قاعدة وراها بتسرحلها شعرها وهي مبسوطة.
كانت فرحانة بهزار جدتها اللي مبيخلصش رغم إن هي عايشة بصعوبة عشان ما بتقدرش تمشي من سنين كتير، وقاعدة على الكنبة دايمًا، ومقدرتش تشتري كرسي متحرك عشان يساعدها إنها تتحرك بسهولة، بس برغم كل ده كانت على طول بتضحك، وكانت محبوبة من كل اللي حوليها.
ليلة العمر الذهبية (الجزء 9) للكاتبة حنان حسن
أحببتها أثناء انتقامي (الجزء الثاني) للكاتبة عليا حمدي
احببتها اثناء انتقامي( الجزء 45)
نسمة: خلاص يا تيتا كفاية إنتي لسه مخلصتيش إيه البطء اللي بقيتي فيه ده؟
خبطتها الجدة في كتفها وقالت: أنا بردوا اللي بطيئة يا أستاذة؟ ده بدل ما تعترفي إن شعرك طويل ومش راضي يخلص!!
نسمة: إيه يا تيتا هو إنتي هتحسديني، قولي الله أكبر ده أنا ماعنديش غير شعري اللي أفرح بيه!!
الجدة رقية ردت عليها وهي بتضحك: أنا أحسدك يا بنتي، إنتي مفكرة إن شعرك ده أحلى من شعري، ولا إنتي ناسية إنك ورثاه من أمك اللي هي أصلًا ورثاه مني يا بت يا براوية إنتي!!
ضحكت نسمة في سرها وهي بتسمع جدتها وهي بتقول: بدل ما تحمدي ربنا إنك لقيتي حاجة حلوة تورثيها مني بدل ما كنتي ورثتي شعر أبوكي اللي مش حلو.
نسمة: شعر أبويا مين بس اللي طالع عينه ده! ده من زمان مفيش إلا شوية على الجناب.
الجدة رقية: أيوه أيوه ما أنا أخدت بالي، ده بقى عنده طريق واسع في راسه تعدي منه العربيات ومش فاضل إلا كام شعرة موجودين في الصحراء اللي عنده هههههه.
نسمة بطلت كلام وكانت مبسوطة من هزار جدتها، وفجأة سمعت موبايلها ببرن والصوت كان جاي من أوضتها فقامت بسرعة وهي بتقول: يا لهوي يا تيتا اتأخرت أوي وأكيد دي صاحبتي كريمة اللي بتتصل عليا عشان تشوفني اتأخرت ليه.
الجدة: ولا اتأخرتي ولا حاجة يا بنتي أحنا لسه في أول اليوم، والدليل على كده إن البت غالية لسه ما جتش لحد دلوقتي ولا استعجلتنا.
وأول ما الجدة رقية خلصت الكلمة لقينا الجرس بيرن وجاي صوت من ورا الباب بيقول يلا يا نسمة بقى اتأخرنا على الشغل.
نسمة قالت وهي بتشاور على الباب: شفتي أهي الأستاذة جت على السيرة، مش كنتي إفتكرتي مليون جنيه يا تيتا ولا أي حاجة حلوة.
ولسه كانت راحة تفتح الباب قامت جدتها شدتها من عبايتها وقالتلها متخليش حد يشوف شعرك، غطيه الأول وبعدين أفتحي الباب.
نسمة كانت لسه هتعترض على كلام جدتها بس راحت لمت شعرها بسرعة كحكة عشان تفتح لغالية صاحبتها اللي كانت ساندة على الباب.
غالية قالت لنسمة أول ما فتحتلها: هو أنتي لسه مخلصتيش، إنتي عايزة يتخصم مننا في الشركة يا نسمة!!
نسمة: إن شاء الله مش هيتخصم مننا حاجة، خشي بس إنتي وأنا هخلص على طول.
نسمة قالت الكلمتين دول وهي داخلة على أوضتها، وغالية دخلت البيت وراها عشان تسلم على الجدة وهي بتبص في المرايا الصغيرة اللي كانت في شنطتها عشان تتأكد إن هي جميلة: صباح الخير يا تيتا أخبارك إيه النهاردة؟
الجدة رقية بصتلها وبعدين ردت عليها: أهلًا يا غالية أنتي عاملة أيه؟ ومامتك عاملة أيه؟ مبقتش تسأل عليا يعني!!
غالية: الحمد لله كويسين، تلاقيها بس مشغولة شوية وهتيجيلك أول ما تفضى.
كانت غالية عارفة إن رقية مش عاجبها لبسها وعمالة تبصلها من فوق لتحت.
الجدة رقية: بس ما شاء الله عليكي مطولة الجيبة من ناحية ومقصراها من الناحية التانية عشان الناس تحتار وميعرفوش هي طويلة ولا قصيرة.
غالية جزت على سنانها وقالت: يا ستي دي موضة، إنتي بس ما شفتهاش قبل كده.
رقية قالتلها وهي بتتريق على كلامها: وطلعت في الجرايد بقى الموضة دي ولا طلعت في التلفزيون!!
غالية لفت وشها بعيد عنها عشان عارفة إنها مهما حاولت تقنعها هي مش هتسيبها في حالها بردوا.
أول ما نسمة خرجت من أوضتها غالية قالتلها: إيه كنتي لبست شوال أسهل، إيه اللي إنتي لبساه ده!
الجدة: شوال في عينك.
نسمة مدتهاش أي انتباه وفضلت تكمل لف الحجاب الطويل اللي هي لبساه وبعدين خدت شنطتها وخرجت من البيت.
غالية خرجت وراها، وبعدها وقفت نسمة وقالتلها: أوعي تكوني إتقمصتي أنا بس نفسي أشوفك بلبس يبين جمال جسمك بدل اللبس الواسع اللي بيتخنك ده.
نسمة ردت عليها وهي متضايقة من طريقتها: أنتي مالك تخينة ولا رفيعة كل واحد ليه ميول، وأنا ميولي للبس الواسع، عشان برتاح فيه.
غالية عوجت شفتها وقالت: طيب عرفنا إنك ما بتحبش الميكب وبتحبي الهدوم الواسعة، أيه رأيك بقى تعملي حجاب على الموضة بدل الكبير اللي شبه بتوع الستات العواجيز ده.
نسمة إتعصبت منها وحاولت تمسك نفسها وقالتلها: أنا قلتلك كذا مرة إني ما بحبش راجل يبص عليا ويعرف جسمي تخين ولا رفيع.
غالية مسكتها من وسطها وبصت لها بإثارة وقالتلها: علفكرة أنا مش فهماكي، معقولة يا عبيطة واحدة عندها إمكانيات حلوة كده وبدل ما تبينها للناس تعمل الهبل ده!
نسمة زقت غالية وهي متنرفزة وقالت: ابعدي يا غالية عني، ويلا عشان نروح الشركة وبلاش تستفزيني.
غالية بعدت عنها وهي بتضحك عليها، وفجأة نسمة سمعت صوت صراخ جاي من شقة أبوها اللي ساكن تحتهم بمراته التانية وعياله اللي خلفهم منها.
نسمة: يا الله شكل بابا بيضرب حد من إخواتي وخالتي سمية بتحوش عنهم، يلا نشوف فيه إيه!
غالية شدتها من أيديها وهي بتقول: لا مش هنشوف يلا عشان متأخرين على الشغل
نسمة: يا غالية دول أخواتي.
غالية: يلا مش ناقصين تأخير هنترفد من الشركة.
