بيت هاني الدالي..
هاني كان بيلبس هدومه وبيستعد لاستقبال أحمد ابن عمته اللي جاي من الصعيد.
ليلة العمر الذهبية ( الجزء 10) للكاتبة حنان حسن
ليلة العمر الذهبية ( الجزء 3)
أحببتها أثناء انتقامي (الجزء الحادي عشر) للكاتبة عليا حمدي
هاني: استعجلي شوية يا سلوى الضيوف على وصول، وكمان روحي استعجلي نهاد.
هاني: أنا عارف إن هي قالت إنها مش عايزة تقابل حد بس الراجل سأل عليها هي بالذات هقوله إيه لما يجي بقى، وإنتي عارفة يا سلوى إني لما بروح الصعيد بيستقبلوني أحسن استقبال وكرم الصعايدة مفيش زيه ومش عايزه يقول عليا أي حاجة مش كويسة هناك.
سلوى: إنت عارف نهاد مش عايزة تقابل حد ليه، عشان مش عايزة أي حد يفتح معاها موضوع طلاقها من خليل وابن عمتك أكيد هيفتح الموضوع ده ومش هيسكت.
هاني: وفيها إيه ده ابن عمتها وزي أخوها ولما يتكلم معاها في الموضوع ده مش عيب، وبعدين هي مكسوفة من إيه هي أول واحدة تطلق في الدنيا ولا دي النهاية.
سلوى خرجت من عند خليل وراحت الأوضة لنهاد اللي كانت قاعدة على السرير لسه وملبستش ولا اتحركت من مكانها.
سلوى: يا نهار أبيض يا نهاد إنتي لسه يا بنتي قاعدة في مكانكـ إنتي عارفه أخوكي هاني في ضيافة ناس البلد مبيحبش يكون في أي تقصير.
نهاد: أنا مش عايزة أقابل حد، بس عشان خاطرك يا سلوى أنا هلبس أي حاجة وهنزل وراكي علطول.
سلوى: اوعي يا نهاد متنزليش عشان أنا لسه سامعة من أخوكي مرشح طويل عريض عن أهل الصعيد وكرمهم واستقبالهم، وهو لما بيقلب وبيطلع العرق الصعيدي معندوش ياما ارحميني.
إنتي عارفه أخوكي يا نهاد بيركز أوي في الأصول، وكمان مبيحبش إنه يطلع صغير قدام حد، فيلا يا أختي قومي قومي بدل ما نسمعلنا كام كلمة منه عشان ده شايط على الآخر.
نهاد فضلت تضحك على طريقة كلام مرات أخوها سلوى عن أخوها، ووافقت نهاد أخيرًا إنها تنزل تقابل أحمد ابن عمتها.
نهاد: بقولك يا سلوى هي حور رجعت من الجامعة ولا لسه؟ أهي دي كمان موضوع تاني، يا رب ترجع من الجامعة قبل ما يحس بيها هاني عشان اتأخرت خالص.
سلوى قبل ما ترد على نهاد سمعت صوت بره الشقة وخمنت إن الضيوف وصلوا وجريت بسرعة على تحت.
ونهاد لبست أي حاجة من الدولاب عشان تنزل تقابل الضيوف زي ما أمر أخوها هاني.
رن الجرس وقام هاني يفتح الباب عشان يستقبل أحمد ابن عمته، وكان معاه ضيف تاني.
هاني: أهلًا أهلًا نورتونا اتفضلوا، وحشتنا يا أحمد أوي إيه الغيبة دي كلها وفينك كده ولا بتسأل.
أحمد عرف هاني على الشخص اللي معاه وقال: ده يبقى باسم الباجوري أخو مراتي أكيد تعرف عيلة الباجوري كويس يا هاني، والحج عمر الباجوري والده معروف أوي وكل الناس بتحبه.
هاني: أهلًا تشرفنا اتفضلوا البيت بيتكوا.
قال الكلام ده وهو بيميل على باسم وبيحضنه، وبعدها قفل باب الفيلا وأخدهم وراح بيهم على الصالون عشان يستريحوا من تعب السفر.
هاني: إيه أخبارك يا أحمد وأخبار الجماعة في البلد عاملين إيه، الواحد نفسه يروح البلد أوي ويشوف العيلة ويسلم عليهم، دول وحشوني أوي.
أحمد: الحمد لله كلهم بخير وإنت وحشتهم، عمتك دايمًا بتسأل عليك ونفسها تشوفك.
سلوى دخلت عليهم الصالون وبدأت ترحب بيهم وقالت: يا أهلًا البيت كله نور بوجودكوا.
أحمد: البيت منور بأصحابه يا مرات أخويا، إيه أخبارك وأخبار الولاد، ونهاد صح عاملة إيه يا ترى بقى كويسة؟ هي مش موجودة ولا إيه مش سامعين ليها حس.
سلوى: لا أبدًا هي بس بتلبس وهتنزل حالًا، دي حتى فرحت أوي إنك جاي النهاردة عندنا.
وبعدها بصت على باسم وقالت: إزي حضرتك وإيه أخبارك، أنا سلوى مرات هاني اتشرفت بيك.
باسم: الشرف لينا يا هانم، دي فرصة سعيدة أوي إني اتعرفت عليكي إنتي والأستاذ هاني النهاردة.
سلوى: البيت بيتكم بقى والغدا هيكون جاهز حالًا عن إذنكوا.
أحمد: إحنا مش عايزين نتعبوكي يا مرات أخويا، مش ضروري يعني الحاجات دي كفاية مقابلتكوا.
سلوى: إيه اللي بتقوله ده يا أحمد عيب كده ده إنتوا أهل الكرم كله وبعدين هو إنت غريب ده إنت صاحب بيت.
خرجت سلوى من الصالون ومشيت ناحية المطبخ عشان تتأكد إن كل حاجة تمام.
هاني: خير إيه اللي فكرك بينا يا أحمد بعد الغيبة دي كلها، طبعًا البيت بيتك يا أخويا تيجي في أي وقت بس أنا استغربت من الزيارة المفاجأة دي وكمان معاك باسم بيه، أكيد في موضوع مهم.
يتبع…
لمشاهدة الجزء الرابع من القصة “اضغط هنا“.
لمشاهدة الجزء الثالث من القصة “اضغط هنا“.
لمشاهدة الجزء الثاني من القصة “اضغط هنا“.
لمشاهدة الجزء الأول من القصة “اضغط هنا“.
