في فيلا محمد الهواري..
أكرم في أوضته وماسك موبايله وبيتكلم مع حد وبيقوله: أنا عارف أني بتقل عليك يا حبيبي، بس عندي ضغط شغل ومشاكل لازم أحلها بنفسي في الشركة، ودي قضية مهمة مش هينفع تتأجل، كل الأوراق اللي هتحتاجها في القضية مع السكرتيرة.
أحببتها أثناء انتقامي (الجزء الخامس عشر) للكاتبة عليا حمدي
المحامي العبقري (الجزء الرابع)
أحببتها أثناء انتقامي (الجزء الخامس) للكاتبة عليا حمدي
في الناحية التانية: تمام يا باشا ولا يهمك أنت تؤمر وأحنا ننفذ يا مستشار.
نزل تحت للفطار وكان أبوه قاعد على السفرة وأمه قاعدة جنبه.
أكرم وطى وباس راس محمد: صباح الخير يا بابا.
محمد حس بتعب في عيون أكرم وقاله: صباح الفل يا حبيبي، طمني عليك في حاجة حصلت، شكلك بيقول أنك منتمش من إمبارح.
أكرم محبش يرد على السؤال وبص لأحلام وباس أيدها وهو بيقو: صباح الورد يا وردة حياتي، هو سليم وسيلا فين مش بيفطروا معاكوا ليه!
أحلام: سليم نزل الصبح بدري وقال عنده شغل مهم في الشركة، وسيلا صحيت وبتجهز للجامعة دلوقتي وهتخلص وتنزل.
أكرم: تمام وأنا النهاردة نازل شغل في الشركة، ما أنت عارف يا بابا المشروع الأخير لازم يتم في معاده وحبيت أساعد سليم شوية الفترة دي ضغط الشغل كتير أوي عليه.
محمد: وأنا واثق إن اولادي قد المسؤولية.
أحلام بصت لأكرم بحب وقالتله: كنت عايزة طألب منك طلب يا بني.
أكرم: أنتي تؤمري يا ست الكل.
أحلام: جدك هيقعد فترة معانا هنا، وحياتي عندك يا بني حاول ما تعملش مشاكل معاه، لو بتحبني وليا معزة في قلبك زي ما بتقول راضيني وأسمع كلمتي ومتزعلنيش طول الفترة اللي جدك هيكون هنا، وحاول تخلي معاملتك معاه أحسن من كده، ده مهما كان جدك.
أكرم مسك أيد أحلام: بصي يا ماما أنتي عارفة أنك عندي بالدنيا كلها ولو حد مس شعرة منك غصب عني رد فعلي بيكون وحش، وجدي مفيش مشكلة بيني وبينه غير اللي أنتي عارفاها، أنا عارف أنه بيحبني بس مفكر أنه لمه يفرض قرارت عليا ويعاملني بالطريقة دي ويضايقك ويضايقني هسمع كلامه، جدي معظم قرراته غلط في غلط وهو مفكرها صح.
محمد: عندك حق يا بني فكل اللي بتقوله، بابا بيحبك وبيعزك وخصوصًا أنك الحفيد البكري للعيلة.
أكرم وهو بيضحك: يعني كل اللي فات ده عادي ومسكت في أنه بيحبني.
الشغالة: عربية حسن باشا وصلت برا يا هانم.
أكرم وقف وطلع يستقبل جده: مش محتاج أقولك إن البيت نور بحضورك يا حسن باشا، وأننا فرحانين بوجودك وسطنا النهاردة.
حسن بصله وبص لأحلام وقال: طبعًا عارف يا أبن محمد.
أكرم استغرب من طريقة جده،وقال: أسيبكوا أنا بقى، عندي شغل بعد إذنكوا، والبيت بيتك يا جدي.
حسن: هو أنت سبت شغلك في المحاكم، وقررت تشتغل في الشركة ولا اي.
أكرم وقف ورجع بص لجده وقال: حضرتك عارف إن سليم من أول ما تخرج وهو شايل الحمل فوق كتافه، فقلت أخفف شوية عليه، وبعدين ما أنت عارف أنه النسبة الأكبر في الشركة ملكي ده غير حصة عمي الله يرحمه، فمن حقي بردوا أدير أملاكي، أحنا بنتعلم منك يا جدي، الواحد مننا لازم يكون شاطر في كل حاجة سواء مجاله أو مجال غيره وإلا منبقاش أحفاد حسن الهواري.
حسن حط أيده علي كتف أكرم وقال: أنا طول عمري بقول إن أكرم ده هو أنا وأنا في عز شبابي.
الجد كمل كلامه: بس يا بني ده حاجة، وإننا نفرح بيك ونشوف ولادك ده حاجة تانية.
أكرم مسك أيد جده وطبط عليها وقال: هتفرح بس لمه ربنا يأذن ويجي وقتها وألاقي بنت الحلال.
حسن: بنت الحلال موجودة وقولتلك عليها، ومن لحمك ودمك مش غريبة عنك.
أكرم بص للجد وقال وهو ماشي ناحية الباب: أنا قولتلك لمه ألاقي بنت الحلال اللي أنا اختارها وقتها هتفرح.
حسن بص لأبنه محمد وهو متعصب وقاله: هو أبنك ده أمتى هيتعلم الأدب.
محمد: أنت عارف أكرم يا بابا قراراته من دماغه.
محمد لأحلام: بعد إذنك يا أحلام ممكن تعملي أتنين قهوة من أيدك.
حسن: لمه تعرف تربي الأول، وتعرف تخلي أكرم محترم ويتعلم الأدب، بس هو ملقاش اللي يخاف عليه ويربيه.
محمد: بعد إذنك يا بابا مينفعش تتكلم بالطريقة دي عن مراتي، ليه كل ما تشوفها تجرحها بالكلام وتقلل منها رغم أنها بتحترم حضرتك وبتقدرك، وبعدين سليم وأكرم عند أحلام واحد ما بتفرقش ما بينهم في المعاملة خالص وحضرتك عارف كده كويس.
حسن: وأنت من أمتى بتتكلم معايا بالطريقة دي، هي كمان لعبت في دماغك، ولا بتعمل كده عشان أسيبلكوا البيت من قبل ما أقعد فيه وبتمشيني بالذوق.
محمد: أكيد مقصدش كده يا بابا وأنت عارف كويس أنا أقصد أيه من كلامي، حقك عليا ما تزعلش.
