في الناحية التانية في بيت نسمة…
كانت رقية فرحانة بلون المانكير الأحمر اللي حطيته ليها صفية على صوابعها وقالت: إيه الحلاوة دي، والله زمان يا رقية بتحطي مناكير! ودوني بقى للكوافير واعملولي شعري.
مطرقة الرعد (الجزء3) للكاتب عمار عبد البديع
عازف بنيران قلبي (الجزء الأول)
مطرقة الرعد ( الجزء 2) للكاتب عمار عبد البديع
باستها نسمة على راسها وكتمت ضحكتها وهي بتتكلم مع خالها.
نسمة: الو يا خالي أخبارك إيه؟
خليل: إزيك يا نسمة أنا الحمد لله عايش إنتي عاملة إيه.
نسمة: ربنا يعينك يا خالي، أخبار العيشة إيه في البلد اللي إنت فيها دي، أنا بشوفها في التلفزيون وشكلها حلو أوي.
خليل: أنا موجود في الصحراء أما البلد اللي إنت بتشوفيها في التلفزيون دي أنا مشوفتهاش، الحياة هنا صعبة والشغل فيها صعب.
سكتت نسمة عشان اتأثرت بالمرارة اللي جوه صوت خالها.
خليل كمل كلامه وسألها: أبوكي بيعمل إيه معاكي، بيشوفكوا محتاجين حاجة زي ما قلتله ولا لسه تايه في دنيته!
سكتت نسمة ورفعت حواجبها من غير ما ترد.
خليل :سكوتك ده بيدل على إنه لسه زي ما هو، قلبي بيحس يا بنتي.
غيرت نسمة الحوار وقالت: متركزش معاه يا خالي المهم طمني عليك وقولي هتنزل أمتى أجازة عشان تحدد مع حبيبتك معاد الفرح؟
خليل رد عليها وكان باين من صوته إنه فرحان: حبيبتي مين بس أنا مبحبش غيرك، وهي مجرد واحدة خطبتها ومش عارف هكمل الجوازة معاها ولا لا.
قالتله وهي مخضوضة: متقولش كده يا خالي إن شاء الله الجوازة هتكمل يا إما أنا هزعل.
خليل: حاضر مش هقول كده تاني إن شاء الله، اديني ماما اسلم عليها عشان وحشتني أوي.
ردت عليه رقية: إنت كمان وحشتني يا نور عيني.
خليل: رديتي بسرعة كده إزاي ومسكتي التليفون أمتى؟
رقية: أنا سمعاك عشان نسمة فاتحه الاسبيكر، إنت وحشتني أوي.
خليل: وإنتي كمان وحشتيني يا أمي ووحشني ضربك على راسي لما كنت بحطها على رجلك.
رقية: بقى كده يا واد متفتكرليش حاجة عدلة يا أبو راس كبيرة إنت.
ضحك خليل ضحكة كبيرة خلتهم هما الإتنين يضحكوا عليها لحد ما افتكرت نسمة حاجة وخدت التليفون من جدتها وقالت: معلش يا خالي لو أنا قطعت ضحكتك بس ماهر موصيني أقولك حاجة.
خليل: عايز إيه السمسار الزفت ده؟
نسمة: بيقولك كده هيبقى فيه خمس شهور قسط متأخر على الشقة، وهو مش هيقدر يصبر عليك أكتر من كده.
خليل: ده معناه إنه ممكن ياخذ الشقة استغفر الله العظيم، بصي يا نسمة قوليله إن كمان شهر وخليل هيبعتلك القسط على البنك عشان أنا الفترة اللي فاتت كنت بسد فلوس الراجل اللي جابلي الشغل والسفر بس خلاص قربت اخلصها.
نسمة: ربنا يعينك يا خالي وتسد كل اللي عليك، خد تيته رقية عشان تروق عليك.
بعد ما خلصوا المكالمة مع خليل قامت نسمة عشان تروق سرير جدتها وتغيرلها الملاية، وفجأة وقفت على خبطة باب البيت وصوت راجل هي عارفاه كويس.
يتبع….
لمشاهدة الجزء السادس من القصة “اضغط هنا“.
لمشاهدة الجزء الرابع من القصة “اضغط هنا“.
لمشاهدة الجزء الثالث من القصة “اضغط هنا“.
لمشاهدة الجزء الثاني من القصة “اضغط هنا“.
لمشاهدة الجزء الأول من القصة “اضغط هنا“.
