في الناحية التانية…
البنات كانوا خارجين من محلات الهدوم والجزم والهدايا وهما صارفين مرتبهم الشهري.
نعيمي وجحيمها (الجزء الثالث) للكاتبة أمل نصر
أحببتها أثناء انتقامي (الجزء الثاني) للكاتبة عليا حمدي
بين أشجار غابات الأمازون (الجزء الثاني)
كريمة اشترت كام طقم للخروج وجزمة وكام تربج تقعد بيهم في البيت، وكمان غالية اشترت زيها وزودت عليها شوية مكياج، ونسمة كانت مقررة إنها تشتري تلفون جديد بس قالت هتأجل شراه للشهر اللي بعده عشان تدي لأختها تمن الحصص بتاعتها وتجيب العلاج بتاع جدتها، ولما كريمة وغالية فضلوا يتحيلوا عليها اشترت فستان ألوانه حلوة أوي، واشترت حجاب مناسب مع ألوان الفستان.
وبسبب الفلوس الكتير اللي صرفوها مقدروش ياكلوا من بره زي ما كانوا ناويين، واشتروا فطاير من عربية كانت واقفة في الشارع قدامهم، وفضلوا يمشوا ويتفرجوا على المحلات وهما بياكلوا.
قالت كريمة وهي فرحانة: الخروجة دي بتديني أمل أكمل الشهر الجديد.
غالية ردت عليها وهي يتهزر: شفتي لو كنتي شغلتينا من زمان كنتي هتفرحي كدا دايمًا.
كريمة: أنا أول ما لقيت فرصة شغلتكوا، ولو كان في فرصة من زمان كنت وظفتكوا من زمان.
نسمة بصت لغالية باشمئزاز وبعدين بصت لكريمة وهي كلها امتنان وقالتلها: غالية بتهزر معاكي هزار تقيل شوية، وتسلمي إنك جبتلنا الوظيفة دي، مبقاش حد يساعد حتى القريبين منه في الزمن ده.
غالية اتكسفت وحاولت تغير الموضوع وقالت: أيوه يا نسمة إنتي عندك حق، إيه رأيك يا كريمة تشتري عربية عشان متركبيش مواصلات تاني بما إنك ليكي وظيفة مهمة في الشركة.
ضحكت كريمة وقالت: أنا فكرت إني اشتري عربية بس ده هيحتاج مني فلوس كتيرة أوي وأنا لسه بساعد عيلتي، أنا ممكن اشتري واحدة صغيرة كده على قدنا وأوصلكوا معايا كل يوم وأنا جاية الشركة.
سقفت غالية وهي فرحانة وقالت: أيوه كده عشان نبقى هوانم زي الموظفين اللي موجودين في الشركة…. أنا بحبك يا كريمة.
نسمة وكريمة فضلوا يضحكوا من كلام غالية، وفجأة نسمة بصت على الوقت وقالت وهي متوترة: يلا عشان أنا قلقانة على تيتا واتأخرت عليها.
اتريقت عليها غالية وقالتلها: قلقانة عليها إزاي يا بنتي إنتي كل شوية بتكلميها وأختك كمان بتراعيها، ولا إنتي مش هاين عليكي تخرجي شوية من غير ما تفكري في حد وتشيلي الهم.
نسمة إتعصبت من كلامها وكانت لسه هترد عليها بس كريمة قاطعتها وهي بتقول: إحنا فعلًا اتأخرنا ونسمة عندها حق لازم نروح.
وجت غالية عشان تعترض بس كريمة مدتهاش الفرصة وقالت: مش لازم أروح بالفطيرة اللي معايا أنا هديها للراجل الغلبان ده وربنا يديم الخير بين الناس.
