خالد مشي وركب العربية بتاعته ولسه هيتحرك محمد فتح الباب وركب جنبه.
خالد: عايز إيه بقى حل عني خليني أدور على مراتي.
عازف بنيران قلبي(الجزء الثاني)
ليلة العمر الذهبية ( الجزء 6)
أحببتها أثناء انتقامي (الجزء الثاني عشر) للكاتبة عليا حمدي
محمد: طب اتحرك من غير كلام كتير.
خالد: ماشي ماشي هنشوف مريم فين بس وبعدين نتحاسب.
على الناحية التانية….
مريم قاعدة في التاكسي وعمالة تندب حظها في أخوها وجوزها وبتسأل نفسها إزاي يكسروها ويجرحوها بالطريقة دي، إزاي محدش راعى مشاعرها، إزاي خالد يخونها مع رغد بعد ما عرف حقيقتها وليه أخوها يباعها عشان خاطر حتة بيت، وهي قاعدة عمالة تعيط وتفكر هتعمل إيه وتبعد عن جوزها وأخوها ولا لا لقيت باب التاكسي بيتفتح عليها ولقيت قدامها ريان.
ريان: إنزلي.
مريم: على فين؟
ريان: إنزلي وهقولك.
ريان حاسب التاكسي ومريم نزلت وهي مستغربة ريان شافها إزاي وجاي ليه؟
ريان: قبل ما تسأليني عرفت مكانك إزاي وشوفتك فين أنا هقولك، أنا كنت في العربية ماشي جنب التاكسي وشوفتك بتعيطي فخوفت لا تكوني مخطوفة ولا حاجة ومش معاكي راجل، أمال أخوكي فين؟
مريم: من فضلك متجيبليش سيرته.
ريان: ليه هو حصل حاجة؟
مريم: أه اتخانقنا.
ريان: طب هتعملي إيه دلوقتي ولا هتروحي فين؟
مريم: هروح لحبيبة صاحبتي ولو تسمح توصلني.
ريان : طيب يلا اركبي.
مريم: طب دقيقة واحدة هتصل عليها اعرفها إني جيالها.
مريم فتحت تليفونها ورنت على حبيبة بس لقت تليفونها مغلق، ولقت رسالة مبعوتلها من حبيبة ومكتوب فيها إنها مسافرة مع جوزها.
مريم قالت لريان إن صاحبتها مش في البيت وإنها مسافرة، وإن هي مش عارفة هتعمل إيه ولا هتروح فين، وريان عرض عليها إنه يكلم أخوها ويصالحهم على بعض بس مريم رفضت بشدة ومنعته يعمل كده.
ريان قعد يفكر يعمل إيه في الموقف ده، وقال لنفسه إنها أكيد مش هينفع تروح البيت عنده وهو قاعد لوحده، وقرر يروحوا كافيه عشان تهدى وتحكيله اللي حصل يمكن يعرف يحل مشكلتها.
في البداية مريم رفضت بس بعد إصرار منه وافقت.
ريان جابلها عصير وجاب لنفسه شاي وطلب منها تحكي.
مريم بدأت تحكيله وعرفته الحكاية من أولها لآخرها، وريان اتصدم واتفاجئ من اللي محمد وجوزها عملوه.
ريان: أنا مقدر شعورك وعارف إنك زعلان وموجوعة من اللي عمله محمد، بس أنا من عشرتي لمحمد أقدر أقولك إنه بيحبك جدًا ومستحيل إنه يفكر يأذيكي، ممكن يكون اللي حصل ده كان غزة شيطان.
مريم: قصدك وزة شيطان.
ريان: هي دي..
مريم فضلت تضحك على طريقة كلامه وعشان بيتكلم عربي مكسر، وهو حب ضحكتها واستغرب إنه مشدود ليها رغم إنه بيشوف بنات بعدد شعر راسه.
ريان استأذن من مريم ودخل الحمام وبعت رسايل لمحمد وعرفه إنه لقى مريم وبعتله اللوكيشن وطلب منه يجي عشان ياخدها.
ريان بص على مريم من بعيد وقال لنفسه: يا سلام لو مكانتش متجوزة كنت اتقدمتلها واتجوزتها.
على الناحية التانية عند خالد ومحمد…..
خالد: وبعدين، إحنا روحنا عند قرايبكوا كلهم وهي مش موجودة عند حد منهم.
محمد: كل اللي حصل ده بسببك.
خالد: اللي حصل ده بسببك إنت.
محمد: أنا زهقت منك متتكلمش معايا وأقعد ساكت بقى.
خالد: أسكت إزاي ومراتي ضايعة ومش لاقيها.
محمد: مراتك دي تبقى أختي قبل ما تبقى مراتك وأنا خايف عليها أكتر منك.
خالد: طب ولما إنت أخ حنين أوي كده بتبيع أختك ب 10 مليون ليه؟ بتبيع أختك عشان بيت!
محمد: اسم الله عليك زوج مثالي أوي ده إنت مفيش حاجة وحشه إلا وعملتها.
خالد: بقولك إيه الكلام خالص ومتتكلمش معايا.
محمد: ألاقي مريم بس وهوريك الكلام على أصله.
بعد فترة صغيرة وصل لمحمد الرسالة بتاعت ريان، فتحها وقراها بصوت عالي، وخالد اتعصب واتضايق عشان مراته مع راجل غريب وطلب من محمد يديله اللوكيشن عشان يمشي عليه ويروحلها.
