بعد ساعة العربية اللي كانوا ركبينها وصلت عند مبنى الشركة ونزلوا منها، نسمة بعدت عن غالية شوية عشان كانت بتتكلم في التلفون مع اختها الصغيرة اللي حكتلها سبب الصويت اللي كان بيحصل بينها وبين أبوها.
لفت غالية وهي بتزعق لنسمة، وقالت: مدي شوية يلا عشان نوصل للشركة الساعة داخلة على تمانية شكلنا هناخد خصم.
أسيل( الجزء الرابع)……انا مش ممكن اكمل مع واحد بيشك فيا بقولك طلقني
عازف بنيران قلبي (الجزء الثامن) للكاتبة سيلا وليد
ليلة العمر الذهبية (الجزء 5)
نسمة خلصت المكالمة بسرعة وقالت: أنا خلصت يا غالية مش كفاية إنك خلتيني محشتش عن اختي الصغيرة.
غالية: وهي اختك صباح جرالها إيه يعني ماتت ولا الإسعاف نقلتها!!
نسمة وهي متعصبة: بعد الشر عليها خلي بالك من كلامك يا غالية، البت رنت عليا وهي منهارة من العياط عشان أبويا ضربها جامد هي وطنط سمية لإنها كانت عاوزة منه فلوس الدرس.
غالية وهي بتضحك: وطبعًا عايزة الفلوس دي منك وإنتي قلتلها أول ما أقبض النهاردة هديك الفلوس، ومش هتشتري طبعًا التلفون اللي إنتي كنتي هتشتريه بدل تلفونك الخربان ده، زي ما بيحصل كل مرة بتديلها فيها الفلوس.
نسمة كانت عارفة إن غالية بتتكلم صح.
نسمة: أنا همشي قدامك وما تكلمنيش ده إنتي عيلة هبلة.
غالية: الله يسامحك.
فتحت نسمة شنطتها وحطت التلفون وفجأة لقيت حاجة معدنية خبطت فيها وقعت التلفون، صرخت عشان المسافة بينها وبين العربية اللي قدمها قريبة أوي وكانت هتتخبط فيها خلاص.
نسمة: مش تخلي بالك يا أستاذ.
السواق: أخلي بالي! ده بدل ما تعترفي إنك إنتي اللي سرحانة وكنت هتعملي حادثة دلوقتي.
نسمة بصتله ومردتش عليه، وبعدها وطت عشان تجيب تلفونها.
السواق: يلا أوعي من وش العربية أنا مش ناقص قرف على الصبح.
نسمة: ربنا يسامحك مش هرد عليك.
قالت الكلام ده وهي بتعيط من اللي قاله الراجل ليها، وبصت جوا العربية لقيت رجلين غيره واحد قاعد قدام جنب السواق شبه أبطال المصارعة.
والتاني قاعد ورا وشكله مسؤول كبير أو بطل من أبطال السينما، واللي ساب المكالمة فجأة وقال للسواق: هو في إيه يا عادل يلا خلينا نمشي!!
رد عادل وهو بيلف وشه ليه: دي بلاوي بتتحدف علينا على الصبح يا باشا.
نسمة فضلت ساكته وعدت من قدام العربية، وفجأة ظهرت غالية وشددتها للعربية قبل ما تتحرك، وبصت للراجل اللي قاعد ورا وقالت: معلش يا جمال بيه بنت خالي بتمر بظروف وحشة وماخدتش بالها من العربية.
حرك الراجل إيده بتكبر وبعدها شاور للسواق عشان يتحرك من غير ما يبصلهم حتى، وده خلا نسمة تحس بالذل.
شدت نسمة إيديها من غالية وصرخت فيها وقالت: تفسري بإيه اللي إنتي عملتيه ده دلوقتي!! هو أنا كنت ناقصة إنك تقللي مني مع واحد زي ده مش كفاية اللي عملوه فيا.
غالية كأنها مسمعتش حاجة من نسمة وفضلت تبص على العربية اللي ماشية قدامهم لحد ما اختفت جوا الشركة.
لفت غالية وشها لنسمة وهي بتضحك جامد وقالت: مرة من نفسي كلمته من قريب، بس ده طلع جميل أوي.
خبطتها نسمة وهي متضايقة منها وقالتلها: مين ده اللي جميل يا بت أصحى كده إحنا في نص الطريق يلا نعدي بدل ما عربية تانية تيجي تدوسنا.
ردت عليها غالية وقالت: ده جمال ابن صاحب الشركة إنتي متعرفهوش ولا إيه؟
نسمة: مش عايزة أعرفه، ومش عايزة أعرفك إنتي كمان، وبعدت عنها.
غالية جريت وراها: استني يا بنتي استني أنا مش قادرة ألحقك عشان لابسة كعب عالي.
جوا الشركة وقدام الاسانسير غالية قالت لنسمة: خلاص بقى بطلي تكشير كفاية جريت وراكي لحد ما تعبت.
نسمة مردتش عليها عشان كانت خايفة حد من الموظفين ياخد باله من صوتها لما تزعق لغالية، بس محاولات غالية الكتيرة أنها تصالحها خليتها تصرخ فيها وتقول: بس، مش كفاية شكلنا اللي بقى زي الشحاتين قدام السواق والراجل اللي كان ورا اللي ما عندوش ذوق ده.
فجأة سمعوا صوت طرقعة من وراهم وواحدة بتقولهم إيه ده هو إنتوا بتتخانقوا طب استنوا عشان أتفرج، وأقوم بالواجب.
غالية: قوليلها يا كريمة دي عايزة الناس تتلم علينا.
نسمة: أنا اللي عايزة ألم الناس، ولا إنتي اللي خلتينا قليلين قدام اللي يسوى واللي ما يسواش.
غالية ضربتها على صدرها وقالت: يا بت إتلمي.
كريمة سألت غالية: هي قصدها مين باللي ما يسواش؟
فجأة فتح باب الأسانسير قدامهم وخرج منه تلت أشخاص، وردت غالية: أنا هاقولك هي قصدها على مين وأحكيلك اللي حصل، بس لازم تعرفي إن الأستاذة دي حتقطع عشنا كلنا.
كريمة وهي مستغربة: وهتقطع عيشي ليه بقى هي عملت إيه بالظبط!!
