قلت: أيوة “أنا بحبه”.
فضلت ساكتة شوية، وبعدين سألتني: “هو يعرف اللي إنتي بتقوليه ده؟”.
عازف بنيران قلبي (الجزء الأول)
ليلة العمر الذهبية (الجزء 5)
عيناي لا ترى الضوء (الجزء الرابع) _للكاتبة هدير محمد
رديت عليها وأنا محرجة، وفي نفس الوقت عندي أمل!!
“لسه ميعرفش، بس هو عارف كويس إني بحترمه، وأقدره، عشان هو مهتم بحالتي، وبعلاجي”.
قالت: “تقصدي إن هو كمان بيحبك؟”.
إتمنيت لو كان فعلا، وأقوله دلوقتي، لكنه كان وهم.
رديت: “لسه محصلش”.
قالت: “وليه بتقوليلي الكلام ده؟ هو إنتي عايزاني أرفض جوازي منه؟!! وأتحايل عليه يخطبك!!”
الدم طلع لوشي، ولقيت نفسي عرقانة عرق شديد.
كانت عينيا بتقولها أيوة، وعينيها كانت بتضحك عليا.
قالت: “إنتي يا إما عبيطة، أو مغيبة، هو إنتي فاكراني ممكن أعمل كده؟ أو تكوني فاكرة إنه يسيبني، ويخطب ممرضة عرجة؟!”
قالت كده، ولفت عشان تمشي من الأوضة.
في اللحظة دي موتت جوايا البنت الطيبة اللي بتعمل خير، وإتولدت الشريرة العرجة.
جريت على شغلي، وأنا مكنتش شايفة قدامي، ودموعي كانت مالية عيني.
مش فاكرة إزاي دخلت العيادة، وقفلت عليا الباب، وإنهرت من العياط.
بعد شوية إتفتح الباب، ودخل الدكتور.
رفعت وشي وعنيا إتقابلت مع عينيه.
على طول خد باله من دموعي، ووشه إتقلب، وقال: “إنتي كويسة؟”.
قمت وقفت، ومسحت دموعي، وقلت في آخر أمل ليا لرجوعي لطبيعة البنت البريئة، الخيرة اللي جوايا: “
إنت ما حستش إني بحبك ولا مرة قبل كده؟”.
الدكتور وشه إتغير من شدة المفاجأة، واللي عمرها ما خطرت على باله.
الدكتور إتوتر، ومكانش عارف يقول إيه؟
قلت: “طب اللي إنت سمعته مني دلوقتي يعنيلك حاجة؟”.
الدكتور بالعافية قال: “أنا بعتذر، بس…”
مكملش الجملة، وماتت البنت الكويسة جوايا من قبل ما تسمع باقي الكلام.
دي كانت آخر مرة نشوف بعض فيها، خرجت في نفس اللحظة من العيادة، ومن المستشفي كلها، ومرجعتش هناك تاني أبدا.
إترفدت من الشغل بسبب عدم إهتمامي، وإهمالي، ومهمنيش اللي حصل.
أمي بدأت تخاف، وتقلق على إن أنا مش في حالتي الطبيعية.
لأني ما حكيتلهاش عن اللي بيحصل في قلبي، وعقلي.
بدأت حياتي تتغير، أنا عرجة، ومش ممكن أعيش حياتي زي بقية الناس.
كنت بشوف البنات اللي حواليا، وأغير منهم، وأحقد عليهم.
كل قرايبي، وصحابي، وزمايلي إتجوزوا.
في الأول كنت بروح خطوباتهم، وأفراحهم، عشان أتبسط، وأضيع وقت.
بس دلوقتي بقيت بكره حتي إني أكون معاهم في أي تجمع، بسبب رجلي العرجة بقيت بتكسف أظهر قدام البنات.
أروح ليه أصلا!!.
لأن أنا مهما عملت، مش هعرف ألفت إنتباه حد ليا، لإني أنا العرجة.
كل الناس نسيوا العرجة!!
نسيوا إنها بني أدمة زيها زيهم، وبتحس، وبتتأثر زيهم.
العرجة هي كمان بتحلم إنها تتجوز، وإن ربنا يرزقها بزوج يحبها، وتحبه، وبتحلم تجيب أطفال ترعاهم، وتربيهم.
يكونوا شايفنها أمهم اللي بيحبوها، وتحبهم.
أنا عديت التلاتين سنة، وانا لحد دلوقتي بنت، بنت عرجة في بيت أبوها.
تقدروا تتخيلوا أنا كنت حاسة بإيه؟
المفاجأة لما خبط على باب بيتنا راجل، وطلب إيدي للجواز.
مكنتش مصدقة، معقول في واحد في الدنيا بيفكر فيا، وعايز يتجوزني؟!!
تمسكت بالحلم ده جامد، آخيرا هيحصل، ويكون عندي زوج يشاركني حياتي، وبيت، وعيال.
بقيت أسأل نفسي يا تري هو يعرف إني عرجة؟
